Храм Рождества
Пресвятой Богородицы

Осетинская Церковь

Сыгъдæг Мады Майрæмы Иры аргъуан

Акафист Моздокской иконе Божией Матери (осет. яз.)

ХÆРЗСЫГЬДÆГ ХУЫЦАУЫНЫЙЙАРÆДЖЫ КАДÆГ,
Мæздæджы йын цы диссаггæнæг ныв ис, уый номыл конд

Скодта йæ Дзæуджыхъæуы æмæ Мæздæджы Алчер Антонин,
ирон æвзагмæ та йæ раивта сауджын Цомайты Харлампи

Кондак 1

Сгуыхаг Фæтæг, о, не'Хсин, Хуыцауы­ныййарæг, кадджытæ кæнæм Дæуæн мах, Дæ цагъартæ, Дæ цытджын нывæй хорзæхы суадон ссарджытæ. Ды та, æхсин, хорззæрдæ Мадау, æдзух у немæ Де'ххусдзинæдтæй, афтæ Дæм куыд сидæм:
Цин кæн, Хорзæхджын, Дæ нывæй махæн хорзæхтæ дæттæг.

Икос 1

Зæдты чыртæ баллæууыдысты, о, Уæларвон Ус-Паддзах, Дæ хорзлæвардзинæдтæй кадджынгонд сыгъдæг нывы алфамблай. Уый тыххæй мах дæр, Дæ нывмæ гæсгæйæ æмæ Хуыцауы сыгъдæг кувæндæтты уый аууоны бын уæвгæйæ, цытджын кæнæм, Æхсин, уый, Де'стырдзинады раз зоныгул кæнгæйæ, æмæ Дын фæлмасæй зарæм афтæ:

Цин кæн, уæларвон Ус-Паддзах, арв æмæ зæххы Хуыцауы Мад, 
Цин кæн, зæдты æмæ хистæр зæдты æхсин.
Цин кæн, уæларвон тыхтæн кадджын кæнинаг.
Цин кæн, адæмы æмбырдтæн стауинаг.
Цин кæн, рæстыты удтæн сæ адджындзинад.
Цин кæн, Хуыцауы ныфсджынты фалмасгæнæг.
Цин кæн, Хуыцауæн мах тыххæй лæгьстæгæнæг.
Цин кæн, Хуыцауы хорздзинæдтæ махæн дæттæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 2

Хуыцауы тыхы сыгъдæг бынатæн, Дæ ныв, Хуыцауы Мад, Гурдзыстоны ус-паддзах Тамарæ, æрхаста Ирыстоны адæмæн. Уыцы нывы æрцыдæй, Хæрзсыгъдæг Хуыцауыныййарæг, Ды æрцардтæ се'хсæн хорззæрдæджын Мадау, æмæ Дæу чи каджын кæны, уыдонæн тæригъæдгæнгæйæ, амоныс Хуыцауæн зарын: Аллилуиа.

Икос 2

Æмбаргæйæ зонæм Хуыцауы диссаджы аудындзинад нæ бæстыл, Гурдзыстонæй æрхæсгæ Хуьцауыныййарæджы нывы хуыз, хорзлæвардзинæдтæй кадджынгонд уæвгæйæ, лæвæрд кæмæн у. Уымæ гæсгæ, Ды нæ мыггагæн цы хæрзтæ кæныс, Æхсин, уыдон тыххæй Дын, арфæгæнгæйæ, зарæм афтæ:

Цин кæн, махыл Дæ хæрзтæ рæдауæй калæг.
Цин кæн, Дæ хорздзинæдтæй стыр хайгæнæг.
Цин кæн, алы бахъуаджы не'ххусгæнæг.
Цин кæн, мах æнаккæгты ныфс мæнг нæкæнæг.
Цин кæн, Дæуæй ныфсджынты Де'ххусæй рох нæуадзæг.
Цин кæн, низтæ дзæбæх кæнынæй Дæ ныв æргомгæнæг.
Цин кæн, диссæгты суадæттæ уымæй цæуынгæнæг.
Цин кæн, махæн нæ низтæ уымæй дзæбæхгæнæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 3

Бæрзонды тых æрымбæрзта Ирыстоны бæстæ, Хæрзсыгьдæг Хуыцауыныййарæджы ныв æм куы ‘рцыди уæд, æмæ Йæ уым уæвынæй ссыгьдæг кодта Ирыстоны зæхх, сыгьдæг кувæндæттæ амайыныл сæ саразгæйæ, цæмæй дзы Дæ фæзындæй, Æхсин, кадджынгонд уа æртæисдзинадджьн Хуьщауы ном, æмæ дзы зарой Уымæн: Аллилуиа.

Икос 3

Дæ хорзæхтæй Кавказмæ иттæг здæхт уæвгæйæ, Ды, Хæрзсыгъдæг Æхсин, сæвæрдтай нæ бæсты Дæ нывы хорзлæвардзинады бындур. Хъахъхъæн уæдæ нæ бæстæ æмæ æгас Уæрæсейы паддзахад дæр, фæрнæй, æмæ Дын сабырæй афтæ куыд зарæм:

Цин кæн, Хуыцауы разлæууæг, дунейы ирвæзынгæнæг.
Цин кæн, Хъахъхъæнæг, Уæрæсейы паддзахадыл Йæ арм дарæг.
Цин кæн, растуырнæг Паддзæхты тых фидар кæнæг.
Цин кæн, Дæ аудындзинадæй мах æдасгæнæг.
Цин кæн, махæн нæ зæххон цард рæстмæ аразæг.
Цин кæн, Хуыцауы фыдæх æнцайынгæнæг.
Цин кæн, Хуыцауы Йæ хорзæхтæй махмæ здахæг.
Цин кæн, Дæ Фырты хорзлæвардзинадæй мах æмбæрзæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 4

Фыд-хъиамæтты æмæ æнамонддзинæдты уад сафта Ирыстоны бастæ, ууыл æнæдин тæтæр арт æмæ кардимæ куы ацыдысты, уæд. Уыдонæй сæхи ирвæзынгæнгæйæ, Куыртаты комы адæм, хохæй Уырысы Паддзахы аууонмæ рацæйлыгъдысты. Сæ ног бынатмæ цæугæйæ, рахастой уыдон семæ Дæ ныв, Хуыцауы Мад, цæмæй уыцы бынат дæр Дæу руаджы ссыгъдæг уа. С'æдас кæн уæдæ, Æхсин, Де'мбæрзæнæй мах цæрæн бынат дæр, цæмæй Дæ аууоны уæвгæйæ, сидæм Хуыцаумæ: Аллилуиа.

Икос 4

Дины (хорз) фиййау, Мæздæгмæ Хуыцауы Мады нывы æрцыд фехъусгæйæ, амайы уым аргьуан, æвæры дзы Дæ сыгьдæг ныв æмæ дзы кæны сауджынтæ, цæмæй уыдон æдзухæй Хуыцауы Мады стаугæйæ, зарой Уымæн афтæ:

Цин кæн, хорзлæвардзинæдтæй аргьуан дзаггæнæг.
Цин кæн, нæ хæдзæрттæн уæларвон арфæгæнæг.
Цин кæн, сыгъдæг моладзандонты æмбæрзæг æмæ хъахъхъæнæг.
Цин кæн, уырнджыты балæууæндон æмæ рæвдауæг.
Цин кæн, ирвæзынгæнæг дин нæ бæсты сфидаргæнæг.
Цин кæн, растуырнындзинад нæ зæххыл ныццаразæг.
Цин кæн, хæрзæггъдау царды мах хъомылгæнæг.
Цин кæн, хорздзинæдтæ кæнын æнтысынгæнæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 5

Хуыцауæй æрвыст стьалыйау фæзынди, Хуыцауы Мад, Дæ ныв Кавказы бæстыл зилгæйæ, æмæ æнæдиндзинады талынджы уæвджыты Хуыцауы зоныны рухсæй ныррухс кодта, хъыгзæрдæты цинæй байдзаг кодта æмæ Де'ххусдзинад агурджыты Дæ Фырты æмæ Хуыцауы хорзлæвардзинадæй барæвдыдта, Уымæн арфæгæнгæйæ зарæм афтæ: Аллилуиа.

Икос 5

Мæздæджы сахары адæм куы федтой Дæ ныв сæ бæстæй цæуын кæй нал комы, уый, уæд зæрдæнкъустæй бамбæрстой, уый Дæ сыгьдæг фæндонæй афтæ кæй у уый, æмæ сæм Дæ хæлардзинад бынтон кæй аздæхтай уый. Аккаг скæн уæдæ, Хæрзсыгьдæг, махыл дæр Дæ хорзæх равдисын, цæмæй уымæй ныфсджын уæвгæйæ, Дæуæн арфæимæ зарæм ацы ныхæстæ:

Цин кæн, Мады уарстæй мах бауарзæг.
Цин кæн, Дæ нывæй махæн адджын рæвдæуæг.
Цин кæн, хорзлæвардзинады суадон уымæй рауадзæг.
Цин кæн, Дæ хæрзтæ махыл арæхæй калæг.
Цин кæн, хорзæхты дуар махæн гомгæнæг.
Цин кæн, зæрдиагон куывдтæ махæй исæг.
Цин кæн, рыст зæрдæты уынæргъынмæ хъусæг.
Цин кæн, мах барæвдæуынмæ æнувыд тындзæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 6

Дæ диссæгтæ æмæ Дæ хорзæхтæ æргом æвдисы Кавказы бæстæ, уымæн æмæ Ды диссаджы ирвæст факæнын кодтай Дæ сыгъдæг ныв арты басудзынæй, уый цы аргъуаны æвæрд уыди, уый куы ссыгьди, уæд. Æртæ хатты уыцы аргъуаныл сыгъд ссæугæйæ, Дын иу адæм ссардтой Дæ ныв аргьуанмæ æввахс, хохы сæр æнæхъæнæй. Уый тыххæй Дын мах дæр зарæм: О, Хæрзсыгьдæг Æхсин, æркæс Дæ хорз цæстæй махмæ дæр, Дæ хæрзсыгьдæг нывы раз лæуджытæм, æмæ нæ Дæ куывдты руаджы фервæзын кæн фыдбылызты басыгъдæй æмæ æнусон арты пиллонæй, цæмæй хъæлдзæгæй зарæм Хуыцауæн: Аллилуиа.

Икос 6

Хуыцауы зоныны рухс рагон Ирыстоны сæрттивын аккаг сфæндгæнгæйæ, Ды ус-паддзах Тамары къухæй арвыстай уырдæм Дæ сыгъдæг ныв, стæй йæ уый фæстæ алыхуызон тых æмæ диссæгтæй скадджын кодтай æмæ афтæмæй Ды, Хæрзсыгьдæг, адæмы Дæ аудындзинадæй кæй хъахъхъæныс, ууыл сæ бауырнын кодтай æмæ уый тыххæй мах, Дæуæй бузныг уæвгæйæ, стауæм Дæу афтæ:

Цин кæн, цæхæрæй Йæ ныв раирвæзынгæнæг.
Цин кæн, бирæ диссæгтæй уый скадджынгæнæг.
Цин кæн, Дæ нывы раз кувджытæн цæрæнбон дæттæг.
Цин кæн, Дæуæй ныфсджынты ирвæзынгæнæг.
Цин кæн, чырыстон мыккæгтæн стауинаг.
Цин кæн, Дæу кадджынгæнджыты кадджынгæнæг.
Цин кæн, уырнджынты курдиат æххæстгæнæг.
Цин кæн, диныл æнувыдты хорзæй сгарæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 7

Ирыстоны адæм хохæй быдырмæ лидзгæййæ, ныххæццæ сты Мæздæджы сахармæ, Дæ диссаггæнæг ныв семæ ласгæйæ, Хуыцауы Мад. Æхсæвы сыгьдæг ныв цы уæрдоны уыди, уырдыгæй уæларвон рухс сæрттывта. Уый фехъусгæйæ, Алчер Гай бирæ адæмимæ рацыди æмæ Йæ разы, Дæуæн Дæхицæн кувæгау, йæ зонгуытыл бакуывта, Хæрзсыгъдæг Хуыцауыныййарæг, лæгъстæдзинады зарджытæ кæнгæйæ æмæ Хуыцаумæ сидгæйæ: Аллилуиа.

Икос 7

Дæ сыгъдæг нывæн ног бынат скæныны уынаффæ Дæ диссаджы нысанæй сæргом кодтай Алчер Гайæн. Куыд ис уæдæ зæгъæн, Хуыцауыныййарæг, Дæ уарзондзинадæн, кæнæ чи радзурдзæни Дæ нывмæ цы хорзлæвардзинæдты тых лæвæрд ис уый? Фæлæ уæддæр айс махæй ацы стауыны æмæ бузныггады зард:

Цин кæн, Дæ диссаггæнæг нывæй Мæздæджы зæххыл æрынцайæг.
Цин кæн, иннæ сахартæн æмæ хъæутæн дæр Дæ нывы æрцыдæй ахъазгæнæг.
Цин кæн, уымæй ныфсджынты цинкæнынгæнæг.
Цин кæн, урс æврагьау уымæй мах æмбæрзæг.
Цин кæн, махмæ Йæ уарзондзинад кæрон нæ кæнæг.
Цин кæн, махыл Йæ хорзæхтæ ахадынгæнæг.
Цин кæн, Йæ хорздзинæдтæй нæ тæригъæдтæ сафæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 8

Дæ нывæн ног цæрæндон сывзарыны æнахуыр диссаг дис кæнын кæны, Æхсин, алкæй дæр. Æхсæвы уæрдон Дæ нывимæ цы ран лæууыди, уый ныййирди, райсомæй та адæм, сæхи дарддæр цæуынмæ куы рæвдз кодтой æмæ сæ галты уæрдоны куы сивтыгъгой, уæд æй фенкъуысын кæнын дæр нал фæрæстой, галты кæд тынг надтой, уæддæр. Æмæ уыцы бæсты алфамблайы адæм Дæ'рынцайæн бынатæй ахæм диссаджы кой куы фехъустой, уæд æрæмбырд сты бирæйæ Дæ нывæн кувынмæ, Хуыцауæн заргæйæ: Аллилуиа.

Икос 8

Растуырнæг адæмтæ æмхуызонæй дæр кадджын кæнынц Дæ ном, Хуыцауыныййарæг, уымæн æмæ Дæ бæрзонд аудынæй диссаджы æххуыстæ кæныс махæн. Диссаг сты Дæ хъуыддæгтæ æмæ диссаг у Дæ Хæрзсыгъдæг ныв дæр, уый тыххæй уымæн йæ рæзы уырнындзинадимæ æрхаугæйæ, ныфсджынæй сидæм Дæумæ афтæ:

Цин кæн, чырыстон мыггагæн Хуыцауæй лæвæрд фарсдар.
Цин кæн, мах тыххæй Хуыцаумæ зæрдиаг кувæг.
Цин кæн, мах тыххæй Хуыцаумæ Йæ куывдтæ рвитæг.
Цин кæн, уырнджыты курдиат Йæ Фырт æмæ Йæ Хуыцаумæ хæссæг.
Цин кæн, Уымæн йæ кады бадæны раз Мадау мах тыххæй лæууæг.
Цин кæн, сабырдзинад æмæ фæразондзинад махæн дæттæг.
Цин кæн, Хуыцауы зæрдæ тæригъæдджынтæм здахæг.
Цин кæн, мах æнаккагты Хуыцаумæ уæндынгæнæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 9

Зæдты мыккæгтæ Дæ иууылдæр, Хуыцауыныййарæг, Дæ Фырты кады бадæны раз лæугæ æмæ чырыстон адæмы тыххæй кувгæ уынгæйæ, стауынц Дæу. Мæздæджы сахары адæм та, Дæ сыгьдæг ныв, уæларвон хæзнадау сæхимæ чи дары, кадджын кæнынц Бæрзонд Хуыцауы, уымæн диссæгтæ кæныны тых раттæджы æмæ зарынц Уымæн: Аллилуиа.

Икос 9

Адæймаджы æвзаг нæ сарæхсдзæни куыд æмбæлы Дæу афтæ стауын, Хæрзсыгъдæг Хуыцауыныййарæг, Дæ нывæй цы диссæгтæ æвдисыс уыдон радзурын. Фæлæ уæддæр, хорз овгæйæ, æмæ Дæ бирæ уарзондзинад æмæ хорздзинадмæ гæсгæйæ айс махæй ацы стауыны зарæг:

Цин кæн, уырнджытыл хæрзмæ аудæг.
Цин кæн, Дæумæ сидджыты æнæмæнг ныфс.
Цин кæн, растуырнджыты æппæты зæрдæ­рухсгæнæг.
Цин кæн, фыдæбонгæнджыты æххуыс æмæ фидаргæнæг.
Цин кæн, æфхæрдтытæн рæвдз сæрылхæцæг.
Цин кæн, лыгъдæтты æмбæрзæг æмæ хъахъхъæнæг.
Цин кæн, æнæфæразонты тых æмæ фидардзинад.
Цин кæн, рынчынты хорзæй æнхъæлцау сгарæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 10

Фыдбылызæй æмæ хъыгдзинæдтæй бирæ адæмты фервæзыны тыххæй Ды, Хуыцауы Мад, нæ мыггагæн хорздзинæдты æвидигæ суадон æвзарын кæныс Дæ сыгъдæг нывæй: Дæхæдæг уый хуызы зилыс нæ бæсты сахартыл æмæ хъæутыл, æмæ уым Дæ кувæг адæмтæн æххæст кæныс сæ курдиæттæ, уый тыххæй мах дæр, ахæм хорзлæвардзинад махæн цы Хуыцау ракодта, Уый стаугæйæ, зарæм Уымæн: Аллилуиа.

Икос 10

Ды дæ Фидар сис, Хуыцауыныййарæг Чызг, уырнджытæн æмæ Дæумæ чи здæхы, æппæт уыдонæн фарсхæцæг, уымæн æмæ арвы æмæ зæххы Сфæлдисæг, Дæ хъæбысы хæссын Йæхи чи саккаг кодта, Уый хъусы Дæумæ, адæмы сæрыл Дæ къухтæ бæрзонд сисгæйæ лæгъстæгæнæгмæ. У уæдæ сис æмæ æмбæрзæн алы уынгæ æмæ æнæуынгæ знæгты ныхмæ махæн дæр, Дæ хæрзсыгъдæг нывы раз уырнындзинадимæ чи æрыфтыди æмæ Дæуæн афтæ чи зары уыдонæн:

Цин кæн, фыдвадæдтæй æмæ фыдбылызæй мах хъахъхъæнæг.
Цин кæн, хъыгдзинæдты бын фæуынæй мах ирвæзынгæнæг.
Цин кæн, удсафæг фыдæвзарæнтæ махæй дард сурæг.
Цин кæн, хæрамдзинад хæлармæ здæхæг.
Цин кæн, хорздзинадмæ мах разæнгард кæнæг.
Цин кæн, махæн кæрæдзийы уарзын амонæг.
Цин кæн, уырнджыты æнаипп царды фидаргæнæг.
Цин кæн, тæхудиаг, мах дæр тæхудиагтæнæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 11

Æдзух Дæ диссаггæнæг сыгъдæг нывæй цы хорзлæвардзинæдты хъуыддæгтæ æвдисыс, Хуыцауыныййарæг, уыдон раргом кæныны тыххæй мах цы зæрдиаг зарæг кæнынмæ фæхъавæм, уый банцайы. Цæмæйдæриддæр тагьд æххъуысгæнæг уæвгæйæ, Ды дзæбæх кæныс алы низ, ирвæзын кæныс фыдбылызтæй Дæумæ алы ран уырнгæйæ сидджыты æмæ Хуыцауæн зарæггæнджыты: Аллилуиа.

Икос 11

Рухсгæнæг цырагъау, уынæм Дæ сыгъдæг ныв, Хуъщауы Мад, Кавказы бæсты Дæ хорзлæвардзинадæй Ды кæй ссыгьтай уый, æгас бæстæ ныййирдгæнæг, бирæты сæ удты æмæ сæ буæртты ирвæзыны тыххæй Йæ рухсмæ здахæг. Уый тыххæй Дын зарæм афтæ:

Цин кæн, Хуыцауы адæмимæ баиугæнæг.
Цин кæн, зæххон адæмты Хуыцаумæ æввахсгæнæг.
Цин кæн, фæсмонгæнджыты тыххæй Хуыцаумæ хатæг.
Цин кæн, Дæумæ сидджытæн сæ хъахъхъæнæг æмæ ирвæзынгæнæг.
Цин кæн, хæудтыты Дæ хорздзинадæй стынгæнæг.
Цин кæн, ныфс сæстытæн фæстæмæ ныфс æвæрæг.
Цин кæн, уынгæгдзинæдтæй тæригъæдтæ сыгъдæггæнæг.
Цин кæн, не'нкъардзинæдтæ Де'ххусæй æнцайын­гæнæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 12

Де'ххусдзинадæй, Хæрзсыгъдæг Хуыцауыныййарæг, куыд раджы, афтæ ныр дæр, Дæ дзæбæхгæнæг нывмæ цæуджыты æнæхай нæ кæныс, чи дæм сиды, уыдонæн тагьд æххуыс кæныс, зианджынтæн се'нкъарды сахат ахъаз кæныс. Уымæ гæсгæ, мах дæр, Де'ххуысы руаджы фервæзгæйæ, арфæйæ дзаг дзыхæй зарæм Хуыцауæн: Аллилуиа.

Икос 12

Ды мах мыггагыл цы диссæгтæ æмæ æххуысдзинæдтæ ныккалдтай, уыдон кадджынгæнгæйæ, мах зæрдиагæй Дæ сыгъдæг нывы раз æфтæм, о, Æхсин, æмæ уымæн цытимæ батæгæнгæйæ, курæм Дæуæй: сараз нæ ирвæзындзинады фæндагыл, у æххуысгæнæг æмæ фарсдар махæн, Дæумæ афтæ сидджытæн:

Цин кæн, уырнджыты фидардзинад æмæ хъахъхъæнæг.
Цин кæн, низджынтæн æмæ рынчынтæн æнæниздзинад дæттæг.
Цин кæн, идæдзты æмæ сидзæрты æмбæрзæг æмæ цæстдарæг.
Цин кæн, тыхстдзинады бафтджытæн сæ ахъазгæнæг.
Цин кæн, æвадæттæн сæ хъуæгтæ æххæстгæнæг.
Цин кæн, зæрдæрыст мадæлтæн сæ рæвдауæг.
Цин кæн, фæсаууонмæ дæр сидзæрты хъахъхъæнæг.
Цин кæн, Дæумæ сидджытæн сæ тагьд сгарæг.
Цин кæн, Хорзæхджын, Дæ нывæй махæн хорзæхтæ дæттæг.

Кондак 13

О, Иууылхорз æмæ хорзæхджын Мад, Хæрзсыгьдæг Æхсин, Хуыцауыныййарæг, айс махæн, Дæ тæригъæдджын æмæ æнаккаг цагьартæн, Дæ сыгьдæг нывы раз Дæхи разау, зонгуытыл чи лæууы, уыдонæн сæ ныры куывд: æркæс Дæ хорзæхæй, нæ уырнындзинад æмæ не'нхъæлкастмæ, фервæзын кæн мах фыдбылызтæй æмæ зæрдæнизтæй, нæ уæлæуон царды ныр дæр Де'ххуысдзинады арм æмæ нæ бахиз æнусон хъиамæттæй, цæмæй Дæ руаджы фервæзгæйæ, æдзухæй дæр зарæм: Аллилуиа.

(Ацы фæстаг кондак фæд-фæдыл 3 хатты зарын хьæуы, стæй та ногæй 1-аг икос æмæ 1-аг кондак).

Хæрзсыгъдæг Хуыцауыныййарæджы куывд

О, Иууылхорзæхгæнæг Æхсин, Хуыцауыныййарæг Чызг, фехъус мах, Дæуæн кувджыты, æмæ нын тагьд фенын кæн Дæ хорзæх, кур Дæ Фыртæй, Уый нæ алы æвзæрдзинадæй куыд фервæзын кæна афтæ. Бахиз алы фыдбылызæй Дæумæ зæрдиагæй се'ргом чи здахы æмæ Дæ сыгъдæг ном чи ары уыдоны. Мах не'ппæт дæр Дæ хорздзинады æмбæрзæны бын бакæн æмæ нæ Дæ цытджын дарæсæй, згъæрау бахъахъхъæн. Æркæс не'ппæтмæ дæр Де'ххуысдзинадимæ Дæ аудыны цæстæй æмæ нæ Дæ куывдты руаджы аккаг скæн Чырыстиимæ цæрын æмæ уæлæрвты зæдты циндзинадæй бафсæдын. Цæмæй­дæриддæр, Æхсин, Ды дæ уæларвонты кад æмæ зæххонты зæрдæлæууæн. Ды дæ нæ ныфс, Дæумæ цæуджыты æмæ Дæ сыгъдæг æххуыс курджыты æппæты фарсдар. Уый тыххæй, Дæ иууылцытджын ныв æмæ Дæ хъæбысы Кæй дарыс, уыцы æппæтылхæцæг Чырыстийы, Дæ нывы уæлæ унгæйæ, мах, тæригъæдджынтæ, цин кæнæм æмæ зæрдиагæй йæ разы æфтæм æмæ йын уарзонæй батæ кæнæм. О, Сыгъдæг Æхсин, Дæ сыгъдæг куывдты руаджы æнхъæл стæм æнцойæ æмæ раст цардæй, нæ уæлæон царды фæндаг ахицæн кæнын æмæ æнæкæрон цардмæ бацæуын, æмæ æртæ-æрттивæгон Хуыцауæн, Йæ зæрдæмæ чи фæцыди, уыцы æппæт сыгъдæджытимæ кувын мыггагæй мыггагмæ. Аммен.

© 2014 – 2017 Храм Рождества Пресвятой Богородицы

Сайт создан по благословению епископа Владикавказского и Аланского Леонида

362007, РСО-Алания, г. Владикавказ,ул. Войкова, 22

Разработка сайтов студия IT WORKS