Храм Рождества
Пресвятой Богородицы

Осетинская Церковь

Сыгъдæг Мады Майрæмы Иры аргъуан

Акафист Божией Матери пред иконою Ее "Моздокская"

Тропарь, глас 1 

От святыя иконы Твоея, о Владычице Богородице,/ исцеления и цельбы подаются обильно,/ с верою и любовию приходящим к ней./ Тако и мою немощь посети / и душу мою помилуй, Благая,/ и тело исцели благодатию Твоею, Пречистая.

 Кондак 1

Взбранной Воеводе, Владычице нашей Богородице, похвальная пения приносим Ти раби Твои, яко честным образом Твоим милости источник стяжавшии. Ты же Госпоже, яко благосердая Мати, буди неотступна милостию Твоею от нас, да зовем Ти:
Радуйся: Милосердая, милости нам иконою являющая.

Икос 1

Ангелов лицы сопредсташа, Небесная Царице, окрест святыя иконы Твоея, благодатию Твоею прославленныя. Темже и мы, взирающе на икону Твою, в божественных храмах нас осеняющую, почитаем ю, преклоняем колена пред величеством Твоим, Владычице, и умильно вопием сице:
Радуйся, Небесная Царице, Мати Господа небеси и земли.
Радуйся, Архангелов и Ангелов Владычице.
Радуйся, горних сил величание.
Радуйся, человеческих ликостояний похваление.
Радуйся, праведных душ сладосте.
Радуйся, живущих в Бозе умиление.
Радуйся, пред Богом предстательнице.
Радуйся, Божественныя благости подательнице.
Радуйся, Милосердая, милости нам Иконою являющая.

Кондак 2

Вместилище святое силы Божия икону Твою Богомати, благоверная Тамара, царица Иверская, принесе людям Осетии. Пришествием убо образа сего Ты, Пречистая Богородице, вселилася еси в них, яко благосердая Мати, ушедряющая благочестно почитающих Тя и воздвизающи их воспевати Богу: Аллилуиа.

Икос 2

Разумне исповедуем дивное промышление Божие о стране нашей, ей же подобие Иверския иконы Богоматере, благодатию прославленное, даровася. Темже, благодаряще Тя, Владычице, за милость Твою к роду нашему, воспеваем сице:
Радуйся, щедроты Твоя на нас изливающая.
Радуйся, благостынею Твоею нам благодеющая.
Радуйся, во всякой нужде нам помогающая.
Радуйся, надежду нас недостойных не отвергающая.
Радуйся, уповающих на Тя помощию не оставляющая.
Радуйся, силою врачевания икону Твою знаменующая.
Радуйся, Тою источники чудес источающая.
Радуйся, Ею немощи наша исцеляющая.
Радуйся, Милосердая, милости нам Иконою являющая.

Кондак 3

Сила Вышняго осеняюще страну Осетинскую, егда икона Пречистыя Богоматере прииде в ню, пребыванием освящающи землю, к созданию храмов святых воздвизающи, да славится имя Триипостастного Бога, явлением Твоим, Владычице, и да воспевают Ему: Аллилуиа.

Икос 3

Имущи премногую милость к Кавказу, Пресвятая Владычице, устроила еси в стране нашей иконы Твоея благодатное утверждение. Охраняй убо область сию и всю державу Российскую, да в мире и тишине воспеваем Ти сице:
Радуйся, Предстательнице к Богу, мир спасающая.
Радуйся, Хранительнице, державу Российскую покрывающая.
Радуйся, Православие в ней утверждающая.
Радуйся, заступлением Твоим нас ограждающая.
Радуйся, земное житие наше добре устрояющая.
Радуйся, праведно движимый на нас гнев Божий утоляющая.
Радуйся, Господа на милость к нам преклоняющая.
Радуйся, благодатию Сына Твоего нас осеняющая.
Радуйся, Милосердая, милости нам Иконою являющая.

Кондак 4

Буря злостраданий и бед опустошаше страну Осетинскую, егда нечестивии татары огнем и мечем по ней прохождаху. Ищуще спасение от них людие Куртатинския области от гор под сень державы Российские преселяхуся. Грядуще на новое место жительства, взяша с собою икону Твою, Богомати, да и оное Тобою освятится. Ограждай убо, Владычице, Твоим покровом и наше жительство, да, осеняеми Тобою, взываем к Богу: Аллилуиа.

Икос 4

Слышав пастырь паствы своея пришествие к граду Моздоку иконы Божия Матере, устрояет церковь, в ней же поставляет святую икону и священники учреждает, да молящиися, выну прославляюще Богоматерь, вопиют Ей;
Радуйся, святых храмов благодатное наполнение.
Радуйся, домов наших небесное благословение.
Радуйся, святых обителей покров и защищение.
Радуйся, всех верных прибежище и утешение.
Радуйся, спасительную веру в стране нашей утверждающая.
Радуйся, благочестие в земли нашей насаждающая.
Радуйся, во благонравии возрастати нам помогающая.
Радуйся, в добрых делех преспевающих укрепляющая.
Радуйся, Милосердая, милости нам Иконою являющая.

Кондак 5

Боготечная звезда явися икона Твоя; Богомати, страну Кавказскую обтекающи и сущих во тьме неве-дения светом боговедения озаряющи, скорбящих радостию исполняющи, ищущих помощи Твоея утешаеши благодатию Сына Твоего и Бога. Ему же благодарственне вопием: Аллилуиа.

Икос 5

Видевше людие града Моздока икону Твою, от места их не двигшуюся, со умилением уразумеша, яко сим проявися великое Твое к ним благоволение и тем показася Святая воля Твоя. Благоволи убо, Пречистая, показати и нам милость Твою, да ею ущедряеми, со благодарением воспеваем Ти хвалы сия:
Радуйся, матернею любовию нас возлюбившая.
Радуйся, иконою Твоею нас сладце утешающая.
Радуйся, источник благодати Тою открывающая.
Радуйся, обилие милости нам изливающая.
Радуйся, милосердия двери нам отверзающая.
Радуйся, усердныя наша молитвы приемлющая.
Радуйся, воздыхания сердечныя послушающая.
Радуйся, скорое утешение подати поспешающая.
Радуйся, Милосердая, милости нам Иконою являющая.

Кондак 6

Проповедует чудеса Твоя и милости область Кавказская, яко дивно оградила еси покровом Твоим чудотворную икону Твою от огненнаго запаления, объявшего церковь, в ней же святая икона пребываше. Трижды бо, церкви возгараемей, людие икону Твою на горе близ церкви неврежденну обретаху. Темже и мы Тебе вопием: О Пресвятая Владычице, призри, всемилостивым оком Твоим и на нас, предстоящих пред Пречистым образом Твоим, и молитвами Твоими избави нас от запаления бед и от пламене огня вечнаго, да с веселием поем Богу: Аллилуиа.

Икос 6

Возсияти свету боговедения в древней Осетии изволяющи, рукою царицы Тамары святую икону Твою в ню послала еси и по сих силою и чудесы Тую прославила еси. И тако уверишася о Твоем промышлении, Пречистая, люди Твоя соблюдающем, благодарственне прославляем Тя сице:
Радуйся, икону Твою из пламене чудесно сохранившая.
Радуйся, сию многими чудесы в стране нашей прославившая.
Радуйся, молящимся пред иконою Твоею здравие подавающая.
Радуйся, уповающим на Тя спасение дарующая.
Радуйся, от христианских родов ублажаемая.
Радуйся, прославляющих Тя прославляющая.
Радуйся, благочестивых чувства услаждающая.
Радуйся, подвизающихся в вере благодатне посещающая.
Радуйся, Милосердая, милости нам Иконою являющая.

Кондак 7

Хотяще людие осетинстии в Кавказскую область преселитися, достигоша града Моздока, носяще чудотворную икону Твою, Богомати. Нощию от колесницы, в ней же святая икона пребываше, небесный свет возсия. И о том слыша епископ Гаий, со множеством народа исшед, поклонишася пред нею до земли, яко Тебе Самей, Пречистая Богородице, молебное пение творя и взывая Богу: Аллилуиа.

Икос 7

Новое место пребывания святыя иконы Твоея чу-десным знамением и откровением епископу Гаию утвердила еси. Како убо изречем Твою к нам любовь, Богородице, и кто возглаголет силы Твоея, дарованныя иконе Твоей? Обаче, приими песнь хвалы и благодарения сицевую:
Радуйся, во граде Моздоке чудотворною иконою пребывати благоволившая.
Радуйся, и прочие грады и веси пренесением иконы заступлением Твоим не оставляющая.
Радуйся, ею на Тя надеющихся возвеселяющая.
Радуйся, иконою Твоею от всякаго зла нас сохраняющая.
Радуйся, тою аки облаком светлым нас покрывающая.
Радуйся, любовь к нам неизсекающая.
Радуйся, милости Своя к нам умножающая.
Радуйся, грехи наша благостию Твоею побеждающая.
Радуйся, Милосердая, милости нам Иконою являющая.

Кондак 8

Странное чудо избрания Тобою, Владычице, новаго места вселения иконы Твоея удивляет умы. Не точию бо свет в нощи облиста место стояния колесницы с иконою Твоею, но и наутрие, егда людие, воздвигшеся далечайше идти, волы своя в колесницу впрягоша, тии не могоша повлещи ю, аще и много биеми бяху. И слышавше окрест живущии о таковем знамении на месте пребывания Твоего, стекошася во множестве, поклоняющеся иконе Твоей и воспевающе Богу: Аллилуиа.

Икос 8

Вси православнии людие славят имя Твое, Богородице, честным бо предстательством Твоим чудесную помощь нам являеши. Дивна суть дела Твоя, и дивна пресвятая икона Твоя, пред нею же припадаше, с верою и упованием глаголем Ти сице:
Радуйся, Заступнице роду христианскому, от Бога дарованная.
Радуйся, пред Господем о нас ходатайствующая.
Радуйся, молитвы о нас Тому простирающая.
Радуйся, прошения верных к Сыну Своему и Богу приносящая.
Радуйся, престолу благости Его матерски о нас предстоящая.
Радуйся, благодать смирения и терпения нам по-давающая.
Радуйся, Божие к нам грешным благоволение.
Радуйся, о нас недостойных пред Богом дерзновение.
Радуйся, Милосердая, милости нам Иконою являющая.

Кондак 9

Всякое естество ангельское, видя Тя, Богородительнице, у престола Сына Твоего предстоящую и за христианы молящуюся, восхваляет Тя, людие же града Моздока, прияше святую икону Твою, аки некое небесное сокровище, прославляют Всевышняго Господа, чудотворную силу Ей даровавшаго, и воспевают Ему: Аллилуиа.

Икос 9

Витийство человеческое не возможет по достоянию благохвалити Тя, Пресвятая Богородице, и воспевати чудеса Твои, от иконы являемая. Обаче, благая сущи, приими от нас за премногую любовь к нам и милость хвалебное пение сие:
Радуйся, верующих благая Заступнице.
Радуйся, призывающих Тя непостыдное упование.
Радуйся, благочестивых всевеселящее радование.
Радуйся, труждающихся помощь и укрепление.
Радуйся, обидимых скорое заступление.
Радуйся, гонимых покров и защищение.
Радуйся, изнемогающих крепосте и утверждение.
Радуйся, болящих благонадежное посещение.
Радуйся, Милосердая, милости нам Иконою являющая.

Кондак 10

Спасти хотящи многи люди от бед и скорбей, источаеши, Богомати, неоскудный источник милости от Твоея иконы роду нашему, тою, аки Тебе самей сущей, грады и веси области нашея обтекающи и в них чтущим Тя полезное прошение исполняющи. Темже, прославляюще Бога, давшего нам благодать таковую, вопием Ему: Аллилуиа.

Икос 10

Стена еси верным, Богородице Дево, и заступление всем к Тебе прибегающим, ибо небеси и земли Творец, на руку Твою носитися благоволивый, приемлет Тя, о людех молебне руце простирающую. Буди убо стена и покров от всех врагов видимых и невидимых и нам, ко пречистей иконе Твоей с верою припадающим и вопиющим Тебе:
Радуйся, от обстояний и бед нас сохраняющая.
Радуйся, от потопления скорбей нас изымающая.
Радуйся, искушения душевредныя далече отгоняющая.
Радуйся, вражду на благосердие прелагающая.
Радуйся, на милосердие нас подвизающая.
Радуйся, любити друг друга наставляющая.
Радуйся, во непорочнем житии верных укрепляющая.
Радуйся, Присноблаженная, блаженство и нам уготовляющая.
Радуйся, Милосердая, милости нам Иконою являющая.

Кондак 11

Пение всякое побеждается, спростретися тщащееся к явлениям благодати, присно бываемым от святыя и чудотворныя иконы Твоея, Богородице, якоже бо скорая помощница, недуги исцеляеши, от бед избавляеши с верою Тя на всяком месте призывающих и вопиющих Богу: Аллилуиа.

Икос 11

Светоприемную свещу зрим икону Твою, Богомати, во области Кавказстей благодатию Твоею возженную, всю страну просвещающую и многих к свету Своему на спасение душ и телес привлекающую. Темже вопием Ти сице:
Радуйся, Бога с человеки соединяющая.
Радуйся, нас земнородных к Богу приближающая.
Радуйся, о кающихся пред Богом предстательствующая.
Радуйся, призывающих Тя сохраняющая и спасающая.
Радуйся, падших Твоею благостию возставляющая.
Радуйся, отчаянным надежду возвращающая.
Радуйся, скорбьми грехи наша очищающая.
Радуйся, печали наша благодатию утоляющая.
Радуйся, Милосердая, милости нам Иконою являющая.

Кондак 12

Благодатию Твоею, Пресвятая Богородице, якоже древле, и ныне притекающий к цельбоносней иконе Твоей не оставлявши, призывающим Тя благопоспешне вспомоществуеши, в печалех бедствующим помогаеши. И мы убо Твоим заступлением спасаеми, благодарными усты поем Богу: Аллилуиа.

Икос 12

Поюще чудеса Твоя и милости, роду нашему явленныя, умильно припадаем к пречистому образу Твоему, Владычице, и благоговейно лобызающе той, молим Тя: настави нас на путь спасения, буди помощница и заступница нам, вопиющим Тебе:
Радуйся, верных утверждение и защищение.
Радуйся, недужных и немощных исцеление.
Радуйся, вдов и сирот покров и соблюдение.
Радуйся, в нуждах сущих вспоможение.
Радуйся, лишение терпящих довольством исполнение.
Радуйся, скорбных матерей утешение.
Радуйся, сиротствующих чад невидимое охранение.
Радуйся, прибегающих к Тебе скорое посещение.
Радуйся, Милосердая, милости нам Иконою являющая.

Кондак 13

О, Всеблагая и Всемилосердая Мати, Пречистая Госпоже Богородице, приими моление сие, ныне Тебе приносимое от нас грешных и недостойных рабов Твоих ко образу Твоему, аки к Тебе Самей припадающих. Призри милостивно на веру и упование наше, избави нас от бед и скорбей, подаждь нам руку помощи в жизни сей и будущия изьми муки, да, спасаеми Тобою, выну вопием: Аллилуиа. Аллилуиа. Аллилуиа.
(Сей кондак читается трижды, затем Икос 1, Кондак 1)

Молитва

О, Всемилостивая Госпоже, Дева Богородице, услыши нас, молящихся Тебе, и яви нам скорую милость Твою, моли Сына Твоего скоро избавитися нам от всякаго зла и сохрани люди, благочестно прибегающия и призывающия имя Твое святое, от всякия напасти, всех нас сохраняющи под кровом благости Твоея, ризою Твоею честною защити. Призри на нас призрением милостивного Твоего заступления и молитвою Твоею сподоби нас со Христом жити и радости ангельския в небесных селениях наслаждатися. Ты бо еси, Госпоже, слава небесных и упование земных, Ты наша надежда и заступница всем, притекающих к Тебе и Твоея святыя помощи просящих. Темже всечестный образ Твой и рукою Твоею держимаго Вседержителя видяще на иконе, радуемся грешнии, со умилением припадаем и любовию сей целуем, чающе, Госпоже, Твоими благоприятными молитвами в мире и благочестии земный путь прейти и небесныя бесконечныя жизни достигнути и Трисиянному Богу со всеми, угодившими Ему, поклонятися во веки веков. Аминь.

© 2014 – 2017 Храм Рождества Пресвятой Богородицы

Сайт создан по благословению епископа Владикавказского и Аланского Леонида

362007, РСО-Алания, г. Владикавказ,ул. Войкова, 22

Разработка сайтов студия IT WORKS